كلام من القلب

فقط اغمض عينيك وتامل هذه الصوره ودع قلبك يكلم الله ليه كل المجد

مستعجل ليه

دا نقاش دار. بيني وبني نفسي

انا عندي سرعه في ضربات القلب فقعد اقول لقلبي مستعجل ليه كل القلوب بتمشي عادي وانت مستعجل علي ايه طيب اديني فرصه اني اتوب اديني فرصه اعيش مع ربنا علي الارض علشان لما رحمة ربنا نشملني ويسترني ويغطيني بدمه واوصل السما والعذراء تسترني بتوبها اعرف ربنا 

انما دلوقتي هاقول لربنا ايه ايه اللي اعرفه عنه او ايه اللي اختبرته منه او ايه المواضيع اللي بيني وبينه لما اشوفه اكملها معاه 

مستعجل ليه ليك وقت محدد علي الارض بتجري ليه اديني فرصه 

لكن

لا مجيب اسمع الضربات ازداد وتسرع ولا ترد علي 

هوذا انا عتيد ان اقف امام الديان العادل فتوبي يا نفسي ما دمت في الارض ساكنه

من قطع صلاة النوم

خمسون عاما

عمري قارب علي الخمسين ولم ينطبق عبي قول الكتاب ذوقوا وانظروا ما اطيب الرب

طيب يارب انت منتظر ايه علشان اذوقك وانظرك يعني استني خمسين سنه تاني ولا ايه ثم انت عارف ان العمره مفهوش خمسين سنه تاني امتي بقي هادوقك امتي هاتحرر من قيود الدنيا وانظرك واتفرس فيك بعد كام سنه ولا بعد قد ايه ولا لغايه امتي الدنيا تسرقني منك انت اللي الكتاب بيقول عنك انك جبار ولا تسلب منك غنيمه هل تتركني اضيع منك وتفترسني ذئاب العالم وليس لي سوا صراخ ادعوك لتنقذني وتشبعني منك

الوقت بيمر وانا قدامي مقوله ابونا يسطس 

الساعه كام دلوقتي

دي باقولهالك قبل نفسي باقولك قد ايه وقت تاني هتسيبه يعدي وانا بعيد عنك يا اقمت المفلوج هل عجزت عن ان تقيمني 

لعازر قد انتن وقلت حبيبي قد نام انا اعلم جبلتي من الخطيه 

لكن

اسمك قد دعي علي فانظر لي تحت دم ابنك يسوع 

لا يوجد في شيء صالح واحد استطيع ان اقول به انا ابنك

لكن لي عين دامعه انظر بها اليك قائلا ارحم يارب عبدك وابن امتك لا تنسي جبلت يديك 

هل يعقل ان تنسي وانت من تعول الارمله واليتيم والغريب والضعيف والكسير

انت رجاء من ليس له رجاء عزاء من ليس له عزاء لا تتركني بل ارحمني واذكرني واسترني يارب متي جئت في ملكوتك

هل انتظر وكم انتظر من وقت حتي تاتي كاعصار تغير حياتي لما ترضي عيناك حتي وان قال من اشتكي من هذا لا تستحي ان تدعوني ابنك 

الغربه

يا دنيا طالت رحلتي وطالت الايام

حاسس بغربه ونفسي ارتاح من الحزن والالام

الغربه نار دمع ومرار لي اشتياق اني ابقي معاك وارجع لداري قوام

متي اقول وقت انحلالي حان ايس زهقا ولا شعورا غير مبرر لكن اريد ان ارتاااااااح 

ليس هذا المكان ما اريد ان اكون فيه 

زمان كمت اقول احنا في زمان غلط مش دي المحبه اليي باشوفها ولا دي العشره المسيحيه ولا ولا ولا 

غريب اعيش غريب امشي فعلا لي اشتياق ان اترك هذا الجسد واكون لالهي 

لا اعمال ترشحني للعيش مع الهي لكني لي رجاء في رحمه ربنا وان العدرا تسترني بتوبها ودم السيد المسيح يغطيني حتي اكون مقبولا امام الله

هوذا الثوب خذيه

خذي الثوب وكل ما تشتهيه يا دنيا فقلبي يملكه سيدي لقد بعت العالم بما فيه ولن اتراجع قد اقع لكن بنعمة سيدي وملكي ومخلصي والهي اقوم قد اضل لكن من يحبني وبذل ذاته لاجلي سيهديني لن يترك جبلة يديه في الطين بل يرفعه وينقيه وينظفه ويجعله كمن لم يسقط ابدا هو الهي يسوعي يقدر ان ينقي حقل حياتي مما لا يريد هو يقدر ان يرفع الحقير يقدر ان يرفعني من المزبله يقدر ان يجعل السواد الي نقاء يجعل الخطيه والشر والاثم الذي بي الي نقاء وصفاء ومحبه خادمه لاجل اسمه  الهي لن يتركني ساقطا بل سيرفعني مهما طال زمن سقوطي سينتشلني مهما طال زمن غرقي في الاثم حتي وان بدي للعالم انه لا يوجد بي امل فهو الوحيد القادر ان يفعل فوق كل شيء اكثر جزا مما نبتغي او نرجو ونامل 

ساطيع الله ساسير اليه حتي وان كنت اجر رجلي جرا 

احبك الهي شعور لا يعبر عنه بكلمات 

محبتك لا يعبر عنها بكلمات 

احبك

احبك

احبك 

اسئله غريبه

باسم الاب والابن والروح القدس اله واحد امين

لما الواحد بيعي هل بيطلب الشفاء علشان المرض وحش وجسم اتهد منه ولا علشان خايف من الموت ثم ليه الواحد بيخاف من الموت لان مجهول ولا لان اعماله مش هتوديه السماء

احب اطمن الكل ان الكتاب بيقول وباعمالي ليس لي خلاص

دي رحمة ربنا هي اللي بتقبلنا وترفعنا ومحبته لينا هي اللي بتسترنا

لحظه فارقه هي اللي بننتقل فيها من حاله لحاله امتي محدش يعرف لكن اللي اكيد ان الكل لازم يعدي بيها اللحظه دي

والسؤال ايه اللي عملته علشان اللحظه دي 

ايمانك ايه ؟ ثم ان كل اللي كنت بتؤمن بيه هتشوفه وتلاقيه

ربنا يرحمنا

 سلام

تجربه شخصيه. بعد الموت يوجد فرصه

باسم الاب والابن والروح القدس اله واحد امين

الموضوع بدا من شهر اغسطس ٢٠١٣ كنا بنخدم في دير العذراء وفي نهايه الخدمه كلنا بنقول لبعض كل سنه وانت طيب لكن في نهايه اليوم واحد جه وقالي علي انفراد بعيد عن المجموعه 

ربنا يطول في عمرك

ضحكت لاني اول مره اسمعها وقلت بيني وبين نفسي انا فين والموت فييييييين وانا صحتي زي البومب وسني لسه صغير ٤٣ سنه وما باشتكيش من حاجه المهم ضحكت وخلاص ومن حوالي شهرين وانا مروح انا ومراتي والبنات من السنتر واحد ادانا نبذ وعنوانها اين ستكون في الابديه ما شيلتش في دماغي وطنشت وقلت عادي بس اللي مش عادي ان واحد يوزع نبذ الساعه ١١ بالليل  المهم طنشت وفي يوم ٢٨ فبراير ٢٠١٤ طلعنا رحله للبابا كيرلس ومارمينا وانا باجهز الحاجات والاكل مع مراتي لان دي رحله يوم واحد وراجعين وهنقضدي الليل في السفر سمعت صوت بيقولي هتموت فطنشت عادي جدا وطلعنا الرحله وتقريبا واحنا في السكه بين مصر واسكندريه حسيت بهبوط شديد عرق غزير جدا جدا وسرعه في التنفس عاليه وبعدين محستش بحاجه ولقيت مراتي بتقولي عصام عصام. بصيتلها وحركت ايدي شاورت لها ايوه لاني كنت تعبان جدا ومش قادر ارفع ايدي وجسمي تلج جدا

اتاري في اللحظه دي ( بالنسبه لي ) كانت ربع ساعه مراتي بتقول انا شخرت شخره غريبه وعيني رفعت لفوق ومفيش نفس حطت ايدها عند بقي مفيش نفس ولا عند مناخيرييعني مت 

مات

المهم ربنا اراد اني ارجع تاني وكان فيه دكتوره جنب مراتي ىقاست النبض بعد مت رجعت لقيته ضعيف وبدا يعلي ووصلنا دير مار مينا وابونا صلي لي واتناولت والامور عادت تمام ادرجه ان الدكتوره لما شافتني واقف اتخضت كانها شافت عفريت وربنا اراد اني ارجع تاني

كل الاعراض بتقول اني دخلت في حاله اسمها ارتجاف بطيني وسكته قلبيه والمفروض اني ما ارجعش ( sudden cardiac death - Ventricular fibrillation ) وعلي حسب ما عرفت وقراتي وخلفيتي الطبيه اعرف ان من يصاب بهما لايعود لكن الله ليه كل المجد له راي اخر

ما اريد ان اقوله للجميع 

ما تفتكرش ان صحتك كويسه معناه ان الموت بعيد عنك ممكن في لحظه تموت ممكن دلوقتي او اي وقت 

توب قبل فوات الاوان

فالله الآن يأمر جميع الناس في كل مكان

أن يتوبوا متغاضياً عن أزمنة الجهل

أع17: 30

سلام

سؤال لكل خادم

كثير نبقي مشغولين بالخدمه والمخدومين لدرجه ان فيه احيان بننسي اطفالنا او زوجاتنا ونقول ما هو كله علشان الخدمه لكن الكارثه ان احنا كمان بننسي ربنا وبنهتم بالخدمه وبتصبح الخدمه مركزه حوالي انا 

انا اللي باخدم انا اللي باحضر الدرس انا انا انا انا 

طيب حبيبي فين ربنا من كل اللي بتعمله بيتك بيتهد لاهمالك ليه علاقتك مع ربنا اللي هي اساس كل حاجه بتضيع وبتتسرق منك من غير ما تحس 

انت فعلا ما بتعملش حاجه غلط لكن مش بتعمل الصح

دع الله يقود سفينه حياتك

سؤال محير

كثير من الناس بتتمني تشوف السيد المسيح او العذراء مريم او اي حد من القديسين

لكن السؤال افرض انه ظهرلك فعلا هتقوله ايه وسيبك من كلمه كثييييير افرض فعلا انه ظهرلك 

اقعد مع نفسك وقول هتقوله ايه هتلاقي انك مش هتقدر تتكلم اكثر من ثلاثين ثانيه يعني نص دقيقه وبعد كده تسكت هل فعلا عمق العلاقه مع ربنا نص دقيقه

سؤال محير ومتعب